عودة الابن الضال

دا مش اسم الفيلم لع دا انا . انا الابن الضال كان بقالى شهرين مروحتش من الزقازيق عشان المشروع و عشان الامتحانات بجد حسيت باحساس تانى خالص لما رجعت البيت او لما وصلت اسكندرية كنت طول الفترة اللى فاتت دى متنشن اوى بطريقة بشعة اللى اتخانق معاه و اللى اشتمه و طول الوقت تركيزى فى انى عايز اروح و خلاص و جيت على ناس كتير بالطريقة دى عشان كدا اخدت قرار مع نفسى و دا من ضمن قراراتى .كلام كبير اوى ها؟؟. انى مهما اتغربت او قعدت فى حتة مش بلدى لازم اكون متحكم فى نفسى عشان اعرف اتعامل مع الناس
معلش غبت شوية عشان الامتحانات بس ادام رجعت البيت فانا حارجع اكتب تانى ان شاء الله و اطلع اللى جوايااااااااااااااااااا

Plz Meat El-Ne3na3y

Plz Meat El-Ne3na3y

1,2,3,4,50,100,300,400,1000,2000,100000000000000000000
ايون هو دا بالظبط اخر رقم اللى انا كنا عايزه الكبير دا ايوه . عندكوا فكرة انا قلت كمية كلمة انا اسف و سورى كام مرة لو توقعتوا عمركوا ما حتوصلوا للرقم الاخير دا اللى انا مش عارف اقراه اساسان عشان كدا عملت الحوار دا مع واحد كان نفسى اكلمه من زمان ووصلتله اخيرا
النعناعى :1,2,3,4,50,100,300,400,1000,2000,100000000000000000000000000000000
نفسى : ايه يابنى بتعد ايه ؟؟؟؟؟ انتا عبيط و لا ايه ؟
النعناعى : بقولك ايه سبنى فى حالى دلوقتى مش ناقصاك
نفسى : طب قولى يمكن اساعدك انا انتا ناسى انى الوحيد اللى بتفضفضله
النعناعى : صح عند حق طب انا حقولك بس اوعدنى متقولش لحد و لا تكتب فى الجروب و لا المدونة
نفسى : عييييييييييييييييييب تعرف عنى كدا يا نيعو يا حبيبى
النعناعى : ماشى لما نشوف . بص يا سيدى المشكلة دلوقتى انى عمال اعد كام مرة قلت فيها اسف و سورى مش عارف الرقم كل شوبة عمال يزيد و مش فاكر اخر رقم وصلتله
نفسى : تااااااااااااااااااانى يابنى حرام عليك مانا قلتلك انتا اللى غلطان
النعناعى : غلطان ازاى بس فهمنى تانى معلش
نفسى : هه ماشى يا نيعو تانى . انتا يا عم عندك نفس المشكلة بقالك سنين انك على طول بتقول اسف
النعناعى : و ايه يعنى مش ببقى غلطان لازم اقول
نفسى : يا عم استنى مقلناش حاجة بس انتا سواء بتبقى غلطان او مش غلطان بتقول انا اسف . حتى لو حد غلطان فيك جامد انتا اللى بتصالحه دا عبط
النعناعى : احترم نفسك و بعدين انا مبحبش حد يزعل منى عشان كدا انا اللى بصالح الاول
نفسى : بس يابنى مش كدا حد مزعلك ازعل خد اى موقف انتا عمرك ما زعلت من حد
النعناعى : يا سلام و انتا ايش عرفك يعنى
نفسى : !!!!!!!!!!!!!!!!!!! انتا انا و انا انتا
النعناعى : اه صح نسيت دى معلش
نفسى : ما علينا . انا قصدى انك لما حد يزعلك او يعاملك وحش ليه تصالحه من حقك ان هو يجى يصالحك
النعناعى : عندك حق
نفسى : و فى حاجة كمان لو زعلان من حد و لسه باقى عليه ممكن تقوله انا زعلان منك فى كذا و كذا بس شرط متقولش انا اسف او سورى
النعناعى : و حبطل اعد كام مرة عملت كدا
نفسى : صدقنى اه دا وعد منى
النعناعى : خلاص ماشى اجرب و اشوف

دا بالظبط الحوار اللى حصل جوايا لسه فى حاجات كتيييييييير عايز اغيرها فى نفسى و ان شاء الله حعمل كدا و حبدأ بالنقطة دى

النعناعى : انتا بتستعبط انتا كتبت ليه فى الجروب و البلوج عن الحوار دا
نفسى : اعمل ايه بقا مانتا عارفنى
النعناعى : خلاص ماشى يا عم انا اسف
نفسى : لااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا

انا اتعلم عليا

سابلى قبل ما يمشى ذكرى
يحكى ان فى شاب فى كلية حاسبات و معلومات اسمه نيعو وقف مرة فى المحاضرة و قال للدكتور بتاعه حاجة من طراز "المنهج كبييييييييير يا دكتور عايزين نقلل شوية عشان نلحق نذاكر" و اذ بى افوجىء بالدكتور يلا اقفل الكتاب و الشبتر مشروح سلام
سيبكوا من كل دا اللى عايز اتكلم فيه اللى حصل بعدها اتبعتلى جواب على البيت انى غيبت 3 سكاشن و ممكن يتم حرمانى من دخول الامتحان بتاع المادة دى مع العلم انى مغبتش خالص
سامع صوت من بعيد بيقولى ايون يابنى هى دى مصر . حتى لو هى دى مصر المشكلة مش فى كدا المكشكلة ان الجواب دا اتبعت على البيت و ابويا هو اللى قراه . ابويا بقا جاله الجواب من هنا و اتصل بيا و راح مديهوملى على طول و هوب اديلو و انا ساكت مش عارف اقول ايه . الراجل بردو عنده حق هو باعت ابنه عشان ينام و لا يحضر السكاشن
انا بس كنت عايز احكيلكوا على الموقف مش اكتر

كيتو

ارحمونااااااااااااااااااااااااا ايه الناموس دا كولوا مش عارف ليه بقيت خلاص من عشان الكيتو مع انى مبحبش ريحته خالص حاسس انى حعمل قريب رابطة عشاق الكيتو ان شاء الله :D
ايه دا بجد انا عمرى ما توقعت اشوف كمية الناموس دى و انا فى الزقازيق بجد حرام لا بنعرف ننام ولا نذاكر ولا حتى نتفرج على فيلم كل شوية اهرش اهرش و بعد كدا نشتم وبعدين تلاقى الشقة كلها بتسب و تلعن لغاية لما يجى المنقذ ابو 6 بجنيه حبيبنا حطفى الكهربا ونام
هو اه بيريحنا بس انا عايز اقولكوا ان لا ناموسة و لا دبانة فى الزقازيق بتستسلم لازم تطلع ............ الاول و الكميات ايه بقا مرةدخلت الاوضة لقيتها سودا من كتر الناموس اللى فيها
اه و الكيتو فى الزقازيق مش معناه " امشى يا ناموسة يا مفعوصة متقرصنيش" لا بيفضل بردو ناموس بس بالكميات اللى ممكن ننام معاها يعنى 100 او 200 كدا ومن الحجم الكبيييييييييييير كمان
بقلنا اربع سنين على الحال دا و لا بقا ايام الامتحانات اننا ننام ابدا ازاى الناموس يقوم عامل حزب علينا ومبيقرصش ايام الامتحانات بالذات هوبيزن بس مش عارف ليه الله اعلم
الناموسة البيج بوس : حاسبات عندها امتحان انشروا القوات وعندنا اوامر بالذن بس فاهمين طلعوا ......... احنا فى ايام امتحانات
وكل سنة بيرشوا فى الزقازيق والناموس بيزيد والدبان بيكتر هما بيرشوا ايه بالظبط؟؟؟ . نناشد كل ناموس الزقازيق بقبول عرض هدنة ابوس ايد الناموساية اللى خلفتكوا سيبونا فى حالناااااااااااااااااااااااااااااااااااااااااا

To Be Or Not To Be

يوم الخميس بعنوان

To Be Or Not To Be

مش عارف ايه اللى خلانى اقول انا عايز اشرح فى المحاضرة ..... لا طبعا انا عارف عشان انا بطيخة فى الشرح خالص وكنت حاسس طول الوقت وخوفى الكبير انى مبعرفش اقف ادام ناس و اشرحلهم و اقنعهم عشان كدا اتحديت نفسى و قلت لنفسى امتى بقا حاخد ثقة فى نفسى
طب انا بعمل كل دا ليه قصدى يعنى انه مش اجبارى عليا اقولكوا انا .... جزء من طموحى عايز ابقى متحدث قوى ان شاء الله و نفسى اخد كورسات فى دا كتير بس قبل كدا حبيت اخد خطوة الاول وسط صحابى فى الكلية و اتكلم معاهم على الاقل قصدى يعنى وقوفى فى المدرج عشان اقيم نفسى اوحد يقيمنى على الاقل
الحمد لله اخيرا الناس اتبسطت منى اوى النهارده وواحد قالى هو انتا بتاخد كورسات فى البريزنتاشن عشان شرحك كويس اوى . هو قالى كد و كنت عايز اطير مكنتش مصدق دا بيتكلم عليا انا الحمد لله ان فى واحد قالى كد اساسان و بعد كدا الناس كلها الحمد لله
بس الحلو ميكملش .... العيوب بقا عشان اقدر اصلحها ان شاء الله المرة اللى جاية

1- بتنطط كتير و انا بشرح شكلى بيبقى مسخرة هههههههههههه
2- استظرفت زيادة عن اللزوم بس الناس الحمد لله قبلته شوية
3- بتنرفز و انا بشرح وانا فعلا كدا عايز اتكلم هادى شوية عشان بعد كدا

ادعولى فى المرحلة اللى جاية اعمل حاجة ان شاء الله

To Be Or Not To Be

نحن لا نزرع الشوك

محمود : يا محمد يا محمد بطاقة الترشيح جت
محمد : بجد والله
محمود : اه والله
محمد : ها طمنى كلية ايه ؟ .
محمود : كلية حاسبات و معلومات الزقازيق ايه ؟ الزقازيق يا نهار اسود

فى يوم ملوش ملامح و الساعة الله اعلم طلع محمد الشخصية الرئسية للاحداث من مطروح بعد ما ودع اهله عشان الرحلة الطويلة اللى طالعها و يارتها رحلة دى بتبتدى من مطروح و تنتهى بالزقازيق
محمد : هى الساعة كام يا اخ
اللى معاه الساعة : الساعة 2 بليل يا كابتن
محمد: هو فاضل كتير على اسكندرية
اللى معاه الساعة و حنسميه دسوقى : اه لسه ساعتين هو انتا اول مرة تسافر
محمد : اه رايح الكلية فى الزقازيق
دسوقى : يا نهار اسود دانتا لسه ادامك 5 ساعات على الاقل
محمد : قدرنا بقا اهى اربع سنين و تعدى ربنا معانا

محمد نزل الزقازيق فى المحطة بعد عذاب من الطلوع من قطر الهتايته قطر اسكندرية الزقازيق و قال يروح يطمن على الكلية و قعد يسال قالوله الكلية فى حتة اسمها زراعة و اركب السرفيس دا .ركب السرفيس و ياريته ما ركبه علبة سردين مش سرفيس ادفس الناس فوق بعض و راجل غريب عمال ينادى يلا الزززززراعة الززززززراعة بفتح الراء و نزل الحمد لله من السرفيس المهم قدم الورق و خلص و قعد بفكر انا ناسى ايه؟ اه انا ناسى المدينة الجامعية يلا على بركة الله
ونبى يا كابتن هى المدينة الجامعية فين قاله الكابتن و بلا فخر فى شارع فاروق اركب السرفيس دا سورى علبة السردين و يلا فاروووووووووق فارووووووووووق بضم الراء
و نزل شارع فاروق و ياريته ما نزله الشارع الاسطورى فى الزقازيق ميتوصفش من كتر نضافته و لا الناس الاخلاق اللى فيه
اول ما نزل بطلنا محمد يونس فجأة اتنين بيجروا ورا بعض واحد ماسك حزام و عمال يقول للتانى يا ابن التييييييييييت (رقابة ) بس قال دا يوم فل باذن الله اقف فى الطابور ايه الناس الغريبة دى اللى بتقدم ما علينا خلينا نخلص
محمد : عايز اقدم فى المدينة
الموظفه (بكل ادب و احترام ): روح يا اخويا للشباك التانى ايه مش شايف فى ناس كتير يا باى ايه الناس دى
بعد لفة كبيرة من الورق عرف ان هو لازم يختم و يرجع تانى الرحلة الاسطورية دى تانى فى خلال يومين عشان يسكن بدرى يا دى القرف
المهم عدت حوارات التقديم دى كلها و جينا على اول سنة و دخل المدرج و ياريته ما دخله
الدكتور : انا الدكتور( بفتح الدال) احمد الحشماوى انا حدرسلكوا الرياضة و انا ملاحظ ان البنات هنا حلوين اوى اوى و عنلاحط (بالعين) ان الصبيان شكلهم يقرف ما علينا اول محاضرة عن كذا و كذا و كذا
تانى محاضرة عميد الكلية دخل بس اثبت مكانك شوف الراجل دا حيقول ايه . الصراحة راجل محترم اوى و اتكلم عن الكلية بشكل حلو
و عدت الشهور مع الناس الغريبة اللى شايفها فى الكلية و المدينة من كتر اللى شافه و انه مبيرجعش لاهله و طبعا الاكل الفظيع اللى فى المدينة حاجات غريبة بتمشى فيه و بينيم مش فاهمين ازاى و طبعا لا ننسى الناس الحاج جنكيس خان اللى بيعمل الاكل و مساعده الحاج ابو الليل .الواد بقا ساكت و مبيتكلمش و طبعا بقا ينام كل يوم فى المدينة بعد حركة بهلوانية افعوانيه عشان ميخبطش فى سرير اللى فوقيه اضطر ان هو يبقى حاجة واحدة انه يبقى حلو و حلو معناه مممممممممم مش عارف الصراحة بس اكيد انتوا حتعرفوا الواحد لما يحلو بيقول ايه. بس يونس بقا اسطورة الحلوين و سميناه كلنا ".الحلو" و
و طلعت النتيجة ايه النتيجة الزبالة دى و طبعا مادة الدكتور احمد الحشماوى مقبول دا الطبيعى و الاخت الفاضلة نانسى امتياز طبعا
جت بقا سنة تانية بعد راحة 3 شهور تقريبا محمد نام فيهم فى البيت لانه مكنش بيعرف ينام فى المدينة و جت تانى سنة و بعد رحلة اسطورية للزقازيق من مرسى مطروح تانى و دخل السكشن
الباشمهندس : انا الدكتور نبيه فهيم بس الكلية مخليانى ادى سكاشن شفتوا بقا نياهاهاهااهاهاهاه انا كنت فى استراليا بعثة نياهاهاهاهاه حدرسلكوا حاجات كتير اوى نياهاهاهاه
و بعد كتير من الطاخ طيخ طوخ (دا شرح الدكتور اللى تقريبا مش فاهم الكلام دا ايه) : انا خلصت خلاص نياهاهاهاه انى كويستشنز مفيش مش معقول نياهاهاهاه سلام
محمد بيقول للكومى : و لا يا كومى هو الراجل دا كان بيقول ايه ؟
الكومى : الراجل ابو سدارى و كوتشى دا هو كان بيشرح مادة علينا و لا ايه (بيهرش فى راسه)
و مع مرور السنين بدات اسطورة الحلو فى النمو و الزيادة و لغاية دلوقتى احنا صحابه مش عارفين نحلل اللى حصله و لا امتى يكون زعلان و لا امتى يكون فرحان و بيزعل ازاى و يفرح ازاى مش قادرين نحدد
اول ما قلتله عايز اكتب عليك قالى اكتب العنوا نحن لازرع الشوك مش عارف ليه بس انا حللت العنوان دا من وجهة نظرى فى البوست دا مش عارف بقا هو حيقول ايه . محمد معانا فى الجروب و بتساذنه ان هو يرد على البوست
اشوفكوا الخميس اللى جاى ان شاء الله
ملحوظة : (طيخ طاخ طوخ) مأخوذة من روايات ما وراء الطبيعة لكاتبها د.احمد خالد توفيق

غير ال 70

غير ال 70
ان شاء الله حتكلم النهارده عن ازاى تكون واحد غير ال 70مليون اللى عايشين فى بلدك مش قصدى تبقى غيرهم انك متبقاش مصرى لا قصدى انك من اول ما تبدأ تدرك ان ليك وجود فى الحياة و يتكونلك شخصية لازم تعمل فرق فى دنيتك و فرق عند الناس اللى عارفينك على الاقل و دا اضعف الايمان
طبعا من الاول كدا دا رأيى الشخصى ممكن اكون صح او لو حد عنده حاجة تانية يشوفها . اول حاجة لازم تكون ايجابى يعنى ايه؟ بداية الايجابيه فى حياتك انك ببساطة تاخد حقك حد ظلمك تاخد حقك فى حالات مثلا متبقاش عارف تاخد الحق دا و دا كتير واحد اقوى منك او ناس نصبت عليك و طلعوا مثلا عصابة حوكشة اى حاجة على الاقل لازم يكون ليك موقف حتى و لو جوه نفسك و مطلعتوش لحد بس اديك عرفت انك ايجابى فى النقطة دى و ربنا ان شاء الله حيجبلك حقك
فى المدرسة مثلا ليه متحاولش تشترك فى الانشطة هى الصراحة بتبقى معظمها حاجات غبيه بس اهو تنمى التعاون مع الناس جواك حينفعك جدا فى الكلية و فى مشروع التخرج بتاعك كمان
ليه متتعلمش تكون قائد على فكرة فى كورسات فى التنمية البشرية جميلة جدا عن ان ازاى تبقى قائد على الناس مش بتامر بس لا ازاى تقنعم بفكرتك و ازاى تخليهم يعملوا اللى انتا عايزه من غير ما تامرهم
ليه متدخلش انتخابات اتحاد الطلبة فى كليتك و تحاول تمثل طلبة كليتك و تجيب حقهم انتا الناس عايزه بس يقضوا حياتهم فى الكلية المدرج و الكافيتريا و يرحوا يذاكروا طيب فكر لو انتا عملت خير و جبت حق واحد لغاية عنده مش ربنا حيعوضك عن الوقت دا فى مذاكرتك يبقى ليه متعملش كدا
خد دى كمان القراءة حاجة جميلة اوى صدقونى الى بيقرا احسن من اللى مبيقراش على الاقل حيبقالك ثقافة و حتكون كام كلمة كدا و متندمش انك قريت و لا تسمع كلام الناس اللى تقولك انتا بتقرا كتب اطفال انا الحمد لله كسبت كتير اوى من قرايتى دا القصد متخافش انك تقرا و مش حتضيعلك وقتك لو انتا فاهم اللى انتا بتعمله .
معرض الكتاب على فكرة بدأ لو عايز حد يروحه و يشوف الكتب اللى هناك .ليه لو عندك موهبة متنميهاش اللى بيكتب شعر و خواطر و اللى عنده موهبة بايده ليه بينساها و يتجاهلها مش ممكن تبقى شخصية جامدة فى المجال دا
لما بابا قالى انا بربيك على اساس ان انتا تبقى واحد غير 70 قعدت يوم كامل معملش حاجة غير انى افكر فى الكلمة دى بس رجعت بكل حاجة لورا و شفت انا عملت ايه من اول ما دخلت المدرسة عرفت فعلا ان انا اتربيت على اساس اعمل فرق و ان شاء الله حعمله زى ما تقولوا دلوقتى الواحد فى مرحلة الاعداد . بجد حاول تعمل حاجة لنفسك و للناس اللى حواليك اشوفكوا الخميس اللى جاى
محمد النعناعى
السلام عليكم

قولووووووووووووووووو

نياهاهاهاهاهاه ههههههههههههههههه و انا راكب فى علبة السردين النهارده المخصصة لتعبئة ركاب الزقازيق سمعت اغنية مسخرة الراجل طول الطريق عمال يرمى فى سلامات للناس
احلى تحية لعبده الكاورك و ايمن الاشكيف البرنس خالد و ادخل عالقاهرة حتلاقى البندارى محمد البندارى و ابراهيم البندارى سلامى للشرقية و بتوع اسكندرية و الشرابية و المطرية و بتوع امبابة و ادخل عالسويس حبيبى روح يا عمر يا سعيد و قول قولوووووووووو قولووووووووووو تعلالى على المنيا و سوهاج و اسيوط اسيوط
روبى حتخش النار سوسو حتخش النار لميا حتخش النار تلبس حتخش الجنة تقلع حتخش النار هيفا حتخش النار سوزى حتخش النار تلبس حتخش الجنة تقلع حتخش النار خش يا عمر يا سعيد قولوووووووووووووووو قولووووووووووووووووو
نياهاهاهاهاهاهاهاه

جول فيرن و جوان كاثلين رولينج

من الارض الى القمر

اللى كتبها ملك الخيال زى ما بيسموه الكاتب الفرنسى جول فيرن عن رحلة الانسان من الارض الى القمر
اتكتبت قبل ما يطلع المكوك الفضائى ب 100 سنة بالظبط . فيرن اتخيل كل حاجة فى القصة المكوك و صواريخ الدفع مع ان الحاجات دى مكنتش موجوده خالص و القصة اتكتبت فى اواخر القرن التاسع عشر
بجد اقراله اى قصة و انتا حتحس بالخيال الجامد اللى فيها بس اقراها و انتا عارف ان دى اتكتبت من القرن التاسع عشر حتعرف الفرق
تعرفوا انه كمان كان ليه الفضل فى اختراع الغواصة النووية فى قصة 20 الف فرسخ تحت الماء و كتب بردو قصة عن واحد سافر العالم فى منطاد مليان هيليوم كل الكلام دا قبل ما تتطلع الاختراعات الجديدة . بجد مش حتندم لو قريتله
المؤلف: جول فيرن

هارى بوتر و مقدسات الموت

القصة من 26 فصل تقريبا فى الفصل ال 17 تظهر كلمة مقدسات الموت اللى هى فى العنوان . القصة حلوة جدا على فكرة بس من اول الفصل ال 17 قبل كدا رحلة الولد هارى و صحابه و هما بيهربوا من اكله الموت . بجد مشفتش تطويل اكتر من كدا كنت قاعد منفوخ و انا بقراها بس بجد للامانة هى حلوة اوى بس فى الاخر
هارى بوتر عموما جو تانى خالص الناس كلها اول ما شفتها قالت دى قصص اطفال و انا كمان قلت كدا بس و انا فى 2 ثانوى كنت قاعد فى الفصل فى المدرسة و كان عندنا حصة احتياطى و لقيت مع واحد القصة دى و بما انى بشم القصص من على بعد اخدتها و قريتها و اول ما خلصت الحصة كنت بعيط لصاحبى و ماسك رجله عشان يسبهالى يوم اكملها فيه
بجد قصة رهيبة كفاية الفكرة بس عالم سحرى و مدارس و كل شوية فكرة جديدة بجد عمرى ما استمتعت فى قصة زى دى تابعوها و اقروها كلكم بس فى اخر قصة نصيحة ابدؤاو من الفصل 17
المؤلف: جوان كاثلين رولينج

نيعو الرومانتيكى

رومانسية النعناعى
*الصبح : صباح الخير يا حبيبى نمت كويس + يلا نحضر الفطار يا حبيبتى + خلى بالك من نفسك + تعالى نطمن على الولاد
*بعد الشغل : حبيبى انتا جيت + محضرالك اكل حتاكل صوابعك وراه + جبتلك هدية يا حبيبتى + حلوة اوى اوردة دى + نص كيلو كباب ههههههههههه دا اساسى
*بليل : موسيقى هادية + ننيم الولاد كفاية عليهم كدا + رقصة سلو + كلام حب يدوخ + انا بحبك
*فى اى يوم : تعالى نصلى كلنا +وردة + انا بحبك + لو فيه فلوس يبقى هدية حلوة+ دليفرى + انتى تعبتى النهارده كفاية كدا + ....................

التنابلة

التنابلة
- نعناعى نعناعى قوم يا يابنى عشان تلحق تذاكر شوية الساعة بقت 12 الضهر يلا عشان الامتحان قوم يلا
- اوك اوك ماشى حاضر يا عم
صوت من بعييييييييييد جاى من الشقة اللى جنبنا : انا لله و انا اليه راحعون
-فيه ايه يا مسعد ؟؟؟
- الحاج محمد مات
الحاج محمد مكنش كبير اوى بس رفض يعمل العملية قبل فرح بنته عشان يسترها الاول و فعلا بعد الفرح على طول وقع ومتحملش جه الدكتور
- يا جماعة مينفعش نعمل العملية دلوقتى دا فى ايامه الاخيرة حرام علينا
الحاج محمد كان ساعات بيصلى بينا فى الجامع اللى تحت الشقة بتاعتنا كان راجل طيب اوى الله يرحمه و يسلم علينا على طول وكنا دايما بنسال عليه مش اوى يعنى بس بنعرف اخباره وكنا عنده من يومين بالظبط سلمنا عليه ومبقولش على طول غير
الحمد لله الحمد لله
اقل حاجة لما يموت على الاقل بعد كل دا ان احنا نزعل عليه مش كدا
- زيزو ؟؟؟ هو احنا مش زعلانين ليه ؟؟
- مش عارف والله يا نعناعى احنا معدنش دم احنا عمالين نضحكمن ساعتها مش عارف ليه
- اكيد فى حاجة غلط يابنى فى الموضوع يا زيزو
- الغلط فينا احنا مش فى الموضوع احنا اللى معدناش دم بس
- طب ما نيجى نزعل شوية و نشوف كدا انا عايز ازعل
- يابنى شوف اصالة بتقول ايه فى كليب الضمير العربى .. نبكى و دمع الناس دمع بغير رياء فاذا غفا الاحساس ماذا يفيد بكاء
- عندك حق لازم نحس الاول عشان نزعل لازم يكون عندنا دم اساسان
خمس دقايق وكانت الشقة كلها عمالة تضحك تانى ونهيس
لازم نتغير لازم نحس باللى جوالينا احنا ليه كدا احنا نقدر نتغير
ان شاء الله

فى ذكرى الحاج محمد
16/4/2008
انا اسف

التنابلة
محمد النعناعى

الانجذاب الغبى

الانجذاب الغبى
عاملين ايه تمام ؟ دا تانى خميس ليا و يارب نوصل ان شاء الله للخميس ال 100 بس انتوا استحملونى بقا شوية . موضوعى النهارده عن الانجذاب و ازاى ممكن يبقى فى اغبى حالاته معاك
يعنى ايه بردو اقولك انا فى حياة كل شاب لطيف فينا مشاعر و احاسيس بس ممكن المشاعر دى تطلع لواحدة بس و ممكن تطلع لمية واحدة هو دا بقى الانجذاب الغبى من الاخر تبقى زى ما بتقولوا بتحب على نفسك
البنت دى حلوة عاجبانى هوب الحق قولها بحبك تقوم كارفاك على طول . بنت تانية عرفتها اتكلمت معاها عشتوا مع بعضكوا شوية فى الكلية تكون انت خلصت حكاية البنت الاولانية تقول ايه دا ازاى مكنتش واخد بالى منها و تبدا تفكر فيها يومين هوب الحق هى دى تقولها بحبك تقوم كارفاك . طب و بعدين دانا ليا واحدة زميلتى عارفانى كويس و بحكيلها على كل حاجة تحكيلها على الموقف الاول و التانى و هى واخداك على انك اخوها بقا و تقعد تحكيلها و كدا بعد ما البنت التانية تقلبك تلاقى دى الصدر الحنين بقا اللى بتحكيله تقوم ايه هوب الحق و تقولها بحبك تقوم كارفاك بعدين بقا.؟
خلاص انا قررت اتغير حشيل كل البنات دى من دماغى و اركز فى واحدة و مش مشكلة دلوقتى لا هى حتيجى بظروفها تيجى بقا مين ؟ ها البنت الرابعة من برا الكلية صاحبة واحد زميلتك تشوفها تقول دى ملاك هى دى بس انا لسه واعد نفسى انى مفكرش بس تقول فى نفسك لا اصل هى بجد اللى كنت بدور عليها من زمان و مش ذنبى الموضوع جه بدرى كدا بعد ما قررت تقوم ايه هوب الحق و تقول انا بحبك متكرفكش بقا تشوف مين دا الاول و تحاول تتعامل معاك و مرة و التانية و انت يزداد هبلك فى كل مرة و هى عايزة تعرفك يمكن تحبك المهم انتوا عارفين طبعا اخرتها اكرف على طول
يا عينى بقا الواد ادمر و مربى دقنه و مكتئب تطلعلك الخامسة منين بقا كنت عارفها بس مكنتش علاقتكوا اد كدا يعنى تشوفك تصعب عليها تحكيلها على الاربع مواقف بتاعتك تسمعك و تنصحك و تسمع كلامها مرة فى مرة و انتا قاعد على السرير تقول هى دى حلاقى واحدة منين بالذكاوة دى و هى كمان جميله لا لا بلاش عشان مخسرهاش ياعمى انت حتخسر ايه قولها . بعد شهر من الحكاوى هوب الحق انا بحبك تقوم كارفاك بس المرة دى كارفة سودا عشان حتبقى صعبة عليها . بعدين بقا مش حنحب و لا ايه يا عمى ما اقوم اشيت احسن بقا تفتح الجهاز و الياهو و تلاقى واحدة و تتعرف عليها من كليتك انتا عارفها بس مبتكلمهاش فى الكلية تفرح و تقعدوا تحكوا و تقولوا بقا اللى انتوا عاوزينه . بس انا عارف شكلها هى حلوة و متجاوبة معايا تستعبط بقا و تقعد تقول ان ليا تجاربى و بتاع و الكلام دا تقولك قول قول اعتبرنى زى اختك حبيبى استلم يا معلمى الكارفه السادسة اه نسيت قبل كدا هوب الحق انا بحبك بس فى نفسك تختلف دى خلى بالك فكاكة بقا
المشكلة مش فى كدا المشكلة ان كدا دا فى ترم واحد مثلا دانتا خرتيت حب بقا و ملكش زى . اضرب بقا فى 2 يطلعلك 12 كارفة فى السنة الدراسية مدة 9 شهور ب 12 كارفاه معدل حلو . ادخلى على سنة تانية بقا حبيبى اعمل فيها العاقل بقا البنات خدت فكرة مهببة عنك حتعمل ايه بقا ايه دا بص يلا اولى دول و لا ايه ابقا مين دى و دى كانت اول كارفاه فى اول يوم فى سنة تانية و طبعا هوب..............اكمل ما بين السطور .
اقولك حاجة انتا بجد لو عايز تتغير من جواك حتعمل كدا من غير اى تعب بس انتا عايز تبقى كدا دا اللى بيجب على نفسه اللى بكلمه دلوقتى عشان تبقوا واخدين بالكوا المهم لو عايز تتغير حتتغير جيب ابرة و قور قور فى دماغك و فضى كل البنات اللى فيها ساعتها بجد ممكن تلاقى اللى انتا عايزها و بتحبها متخافش لو لقيتها تانى يوم دا ممكن يحصل بجد و ممكن تبقى من ال 36 كارفاه اللى اتكرفتها بقالك 3 سنين و فى اغلب الحالات بتبقى كدا واحدة منهم ممكن تبقى صعبة شوية دى انك تقولها ربنا معاك فيها دى مقدرش اساعدك عشان مش عارف اساعد نفسى . انتا بيبقى على عنيك غشاوة من الكتر الحب الزايد عندك خرتيت حب بقا
اللى عايز اوصله ان خلى ايمانك فى ربنا كبير مهما كنت وحش و الناس خدت عنك فكرة غلط لازم توريهم الصح حتى لو طلب منك دا سنين على كدا عشان الناس دى اللى باقيالك و هما اللى عارفينك ساعتها مش حيفتكروا الحب دا كولو اللى حيقولوه و يحكوه ان انتا اتغيرت ازاى و بقيت قدوة لناس كتيرة ازاى
يا رب اكون وصلت نقطتى و مستنى مشاركتكم و اشوفكم الخميس اللى جاى ان شاء الله و السلام عليكم
محمد النعناعى

مين اللى صح

هو مين اللى صح
السلام عليكم معلش يا جماعة بقدم اعتذارى مرة تانية على انى بكتب اول خميس ليا يوم التلات عشان ظروف السفر
المهم انا النهارده عايز اقارن بين مدينتين اسكندرية بحكم انى اتولدت و عشت فيها و الزقازيق بحكم دراستى فيها 3 سنين و دى الرابعة ان شاء الله طب السؤال انا حقارن فى ايه انا مش عايز اقارن المناطق و النضافة و الكورنيش و الكلام الاهبل دا انا عايز اقارن فى التربية تربية كل واحد فينا عامل ازاى تربية واحد من اسكندرية و تربية واحد من الزقازيق و مين اللى صح و ابهاتنا شايفين ايه و احنا شايفين ايه
الاسكندرانية معروفين بالهزار و التهيس بس هل دا صح ممكن ناس تعتبره صح و مفهوش عيب بس مثلا فى الزقازيق يقولك فى حدود بردو عندهم حق ماهو مينفعش مثلا اهزر مع واحدة هزار جامد اكيد حتحرجنى و تقولى فى حقوق بس انا عايز اقولكوا انك مهما هزرت فى اسكندرية مع بنت بتتقبل الموضوع عادى طب ليه ؟ عشان هى صايعة مثلا مش القصد كدا القصد التربية فى اسكندرية ممكن تخرج مع بنات و اولاد وتروحو مثلا تفطروا فى رمضان فى مطعم مثلا و ابوك و ابوها عادى و هى تقولك بابا لارج مفيش مشاكل طب فى الزقازيق ممكن يوافقوا عادى. على فكرة فى كدا و كدا من النوعين فى اى حتة المهم ناس حتقولك فى الزقازيق حرام و انتوا رايحين بصفة ايه حتى لو بصفة رسمية او فى جمعية مثلا طب مين اللى صح ماهما بردو عندهم حق شوية بس من ايه من خلال تربيتهم يعنى هما شايفين ان هما مريضوهاش لاخواتهم انا كمحمد النعناعى قابل عادى لان دى تربيتى انا متربى على كدا خروجات و فسح و البنات اخواتنا هما بقا يقولولك اخوات ايه و ازاى تخرجوا لوحدكوا. مش احنا بقى اللى نرد امهاتهم و ابهاتهم قصدى البنات يعنى هما اللى يردو و يقولوا ادام فى جروب خلاص ايه المانع و دا ابن طنط مش عارف مين و عارفينه و معتبرينه اخوها و هى فى امان معاه سورى يعنى مش الواد دا مراهق مثلا مش حيفكر فى حاجات بعيدة عن هى اخته طب بتوع اسكندرية يقولوا ايه
اقولك انا يقولوا كويس و ماله ممكن الواد و البنت يحبوا بعض و اهم احنا عارفين اهله و الواد محترم و حلو طب هو من الاول صح ان البنت تخرج مع الولد حتى لو فى جروب انا مش عايز ادخل فى الدين لانى غير مؤهل لانى اقول اى كلمه عن كدا اللى قصدى عليه من الاول و للاخر التربية .مين اللى صح فينا انا عارف واحد خاطب تالت عالم اسكواش بنت و طبعا عارفين اللبس و الخروج فى جروب بنات و اولاد بس هو يعمل ايه
عارفين عمل ايه فى الاول كانت بتخرج عادى و بعدين ابتدى يكلمها بهدوء على الللبس و الخروجات و عشان البنت باقية عليه سمعت كلامه و قللت الخروجات بس لسه بتخرج فى جروب بس على الاقل قللت طب هو لو كان خدها قفش كانت مش حتطيقه و لا تعبره دى حياتها و خصوصيتها انتا لسه مبقتش جوزى عشان تقول الكلام دا ليا
الولد دا من اسكندرية ممكن لو كان فى الشرقية كان فسخ الخطوبة و انا زى ما بقول ممكن ان انتوا تعكسوا الكلام بين المدينتين لان فى كدا و كدا حتى فى اسكندرية و فى كل حتة سؤالى بجد مين اللى صح و الموضوع موضوع تربيه و لا ايه و لو تربيه مين اللى صح بردو فى ابهاتنا و مين اللى صح فى المواقف اختى تخرج عادى فى جروب و لا لأ واسمح بكدا و لأ زى ما قلتلكوا انا عادى بالنسبة ليا بس هما بردو فى جزء صح فيهم بس دا من خلال تربيتهم و انا من خلال تربيتى يا ترى مين اللى صح ؟
طولت عليكو عارف بس معلش يوم الخميس بقا شايل الاسبوع كولو و انتظروا الخميس اللى جاى موضوع "الانجذاب الغبى" مع السلامة
السلام عليكم
محمد النعناعى

يوم الخميس

السلام عليكم انا عامل البورد دى ليوم الخميس فقط زى المقالات كدا يعنى انت تلاقى نفسك فى اخر الاسبوع و حصلت مواقف كتيرة اوى و ممكن نشاركك فيها ليه متكتبهاش و نرد عليها انا عموما حكتب ان شاء الله كل يوم خميس بس اعذرونى المرة دى اكتب التلات عشان ورايا سفر و لو مش حكتب خميس معين حبعت مسج و اقول انى بعتذر عن الكتابة الاسبوع دا
المهم يوم الخميس دا خميس لكولو مش ليا بس احنا مستنين طلع اللى جواك

الحلقة الخامسة

الحلقة الخامسة بعنوان
"ya Welcome to MG"
النهارده حتكلم عن المدينة و الناس اللى عرفتهم فيها طبعا فى كل حتة فيه الحلو و الوحش بقولكوا ايه يلا نبدأ احسن بدل المقدمة اللى ملهاش لزمة دى و اللى مبعرفش اكتبها اساسان
اول ناس عرفتها الحمد لله كانوا حلوين و لسه صحاب لغاية دلوقتى بس كانت مكنتش اوضتى . اوضتى الاساسية كانت فى الدور الخامس مش عايز اقولكوا عن السنة الرهيبة اللى قضيتها فى الاوضة دى و ازاى قضيت رمضان مع ناس غريبة جدا و هما كانوا تقريبا السبب انى مجبش تقدير فى السنة الاولى فى الكلية بس بردو لسه صحاب مينفعش اناسهم كدا و اكيد بردو فيه جزء عليا انى مجبش تقدير
تحس فى المدينة ان الناس كلها مكبوتة و السجاير شغالة الله ينور بالذات الدور الخامس كل مرة اطلع و انا جاى من الكلية عمال انهج من السلم الرهيب بتاع المدينة مبعدش الادورا بس بعرف الدور الخامس من شبورة السجاير اللى طالعه من الدور . اول ما تلاقى شبورة يبقى دا الدور الخامس على طول و بعد ما تستنشق رائحة العبير دى تدخل عشان تنام شوية و تستريح من السلم اراهنك ان عرفت تنام فى الدور دا سواء من الاوضة او الناس الغريبة اللى بتدخل عليك و انتا نايم و مصرين انهم يعرفوا مين اللى نايم دا و اكنك عامل جريمة
و اللى يمسك موبايلك و انتا نايم و يكلم الحتة بتاعته و تتفاجىء ان الرصيد خلص مرة واحدة و اللى ياخد فوطتك يعمل بيها حاجات غريبة هما عندهم دا عادى مفيش مشاكل و طبعا السرقات اللى بتحصل كل سنة ربنا ما يوريكم
بس فى السنين اللى بعد كدا عرفت ناس الحمد لله جدعان اوى و لسه احسن صحاب لغاية دلوقتى بس هى بجد سنة اولى هى اللى كانت صعبة اوى
MG

الحلقة الرابعة

الحلقة الرابعة بعنوان المطعم

بعد ما قضيت اول ليلة و اتصاحبت على الصرصار اللى طلعلى من تحت البطانية رحت الكلية و قضيت يومى مع الناس و اتصاحبت على شوية كدا قلت ارجع بقا عشان اكل و خصوصا انى سمعت ان النهارده لحمة فى المدينة
ركبت السيرفيس الاسطورى بتاع الزقازيق و غيرت هدومى و نزلت المطعم معايا البون بتاع الغداء و دخلت المطعم اللى تقريبا القطط فيه اكتر من اللى فى المدينة المهم رحت للحاج جنكيز خان اللى بيدينا الاكل و قعد يحط حاجات فى الطنية بتاعتى كائنات بيضاء عرفت انها رز فى الاخر و بسله الله اعلم مصدرها و قطعة من اللحم قطعة من الكاوتش الصافى بدون شوائب فقلت بادب "ممكن يا جاج تغيرلى الحتة دى بعد اذنك" انا والله طلبت بكل احترام لقيت عاصفة طلعت منه و عمال يقولى "ما هى زى الفل عايز ايه انتوا ايه " طبعا من عايز اقولك الامطار اللى جت على وشى ساعتها من العاصفة اللى طلعها مشيت بعد الاحراج الكبير اللى حصلى و بدات اكل
ايه اللى بيلعب فى الرز دا ؟ سورى الكائنات البيضاء دوقت الاكل ربنا ما يوريك و لا البسلة او الطبيخ عموما لو حطيت عليه اطنان من الملح عمره ما حيتعدل طعمه
تعالى بقا للحمة او اللى بيسموها اللحمه انتا تجيب واحد صاحبك يشد من حتة و انتا من الناحية التانية و تجرى مسافة 2 متر كدا عشان حاجة فيها تتقطع . بعد كدا بقينا بنستخدمها قنابل نشد حتة و نحدف على بعض
و يا عينى على العيش مرة برفع الصنية فوق شوية عشان اعديها من فوق حد ففلت العيش ووقع على راس واحد بعد كدا تقريبا وده المستشفى و عملوله 6 غرز فى راسه
قضيت يومى الجميل جدا و دخلت السرير بحركة بهلوانية عظيمة بعد ما سلمت على الصرصار و قعدت احكى معاه شوية
والله طلع صرصار طيب

الحلقةالثالثة

الحلقة الثالثة بعنوان استلام العهدة و السكن

يا مسهل يا رب الاقى اسمى . الحمد لله محمد احمد عز الدين احمد النعناعى و رقمى فى الكشف 631 يلا بينا . نفس الموظفة السمجة تانى المهم عديت منها و بعد ما خلصت شوية ورق قالولى يلا بقا عشان تستلم عهدتك اخر الدور يمين عند عم ابراهيم
ازيك يا عم ابراهيم ؟ الراجل مردش و بصلى من فوق لتحت و قالى عايز ايه يلا ؟ ما علينا خلينا نخلص قولتله عايز عهدتى راح قايلى استنى شوية و راح مطلعلى الاتى
بطانيتين و ملايتين وكيسين مخدة و ديسك و كرسى و مرتبة جميل والله كل دا بس اللى حصل بعدها مكنش جميل
غلطة عمرى انى فردت حاجتى عشان اشوفها الملايات تقريبا محروقة و كياس المخدة مخرومين دا غير الله اعلم اللى كانوا نايمين عليها كانوا بيعملوا ايه و الديسك عمال يلعب فى ايدى و الكرسى اجارك الله قلت ما علينا اغسلهم فى البيت بس بعد كدا اكتشفت ان مفيش حاجة بتطلع و فضلوا على المنظر دا طول السنة ما علينا . طلعت الاوضة و فرشت المرتبة القميئة اللى ميدنهالى و بقية الكائنات الغريبة اللى اخدتها فى العهدة كنت مضطر عشان كان لازم ابات وممكنتش جايب معايا حاجة من البيت افرشها و انام
فرشت البطانية و نزلت تحتها عشان ادفى هو انا عمال اهرش ليه ؟ ما علينا .ايه اللى فى شعرى دا ؟ ما علينا .طلعت راسى من البطانية عشان اهرش تانى و اشوف اللى فى شعرى لقيت حاجة غريبة اوى
لقيت صرصار جميل اوى قد كف ايدى طالع من البطانية و بيقولى "هالو " . عرفت ساعتها ان هما حيبقوا اربع سنين حلوين اوى

الحلقة التانية

الحلقة التانية منقول من موقع روايات مصرية
" الاسكندرية " ... الحمد لله
لقد جاءني التنسيق علي جامعة الاسكندرية , وكنت في غاية السرور لهذا , حيث أني أحب الحرية وأريد الهجرة من المنزل , فذللت الصعاب أمام أهلي قائلا أنها نزهة وردية أعود منها بعد عام .
- وأين ستعيش
- في شقتنا بالعجمي
- والأكل والمواصلات و ......
- والحل ؟؟
- المدينة الجامعية . هكدذا هتف أبي في عبقرية يحسد عليها , ثم أخذ يروي لي كيف أنه في شبابه كان نزيلا في نفس المدينة , وأخذ يحكي عنها بافتتان وكأن المدينة الجامعية هي عاصمة الجنة .
و أخذ يقنع أمي ثم يقنعني – يبدو أنه قد وجدها فرصة للتخلص مني – ولم أكن محتاجا في الواقع لهذا الإقناع , فأنا أريد أن أسافر .
سافرت إلي مدينة الثغر الساحرة صيفا وشتاء , وأقمت عند أقاربي أولا قبل دخول المدينة ، حتي عندما ظهرت كشوف المقبولين في المدينة تلكأت أسبوعا أو يزيد حتي أعرف ( ايه النظام يعني ) , وفي أحد الأيام سألت أحد زملائي المقيمين بالمدينة :
- حاتم .. انت ساكن في المدينة ؟
بشرود : نعم .
- ايه رأيك في الأكل ؟
- نعم ؟؟
- الأكل .. الأكل ايه نظامه ؟
- الأكل!!!!!أكل ايه يا بني ؟

يبدو أنه من فرط السعادة في المدينة نسي الأكل وشهوات البطن , هذا رائع .
قررت أن أخوض التجربة بنفسي , فذهبت لاستلام غرفتي بالمدينة , وحين دخلتها لأول مرة أصبت بالصدمة فالغرفة التي طالما حلمت بها لا تتسع لي ولحقيبتي معا إلاّ بأوضاع هندسية معقدة , فكيف بالحياة فيها لعام كامل؟!!
كانت المشكلة التي تؤرقني فعلا هي كيفية الصلاة في الغرفة , فإما أن أصلي كالمصابين بالشلل الرعّاش , وإما أن أصلي مثل باقي الخلق و أصطدم بالحائط من خلفي وأمامي وبالسقف من فوقي , أما التحركات داخل الغرفة فهي العذاب ذاته , وهنا خطرت لي فكرة , سألتحق بمدرسة لتعليم الباليه الإيقاعي .. هذا هو الحل الوحيد .
في اليوم التالي جاءني أحد ( الجيران ) طرق الباب ففتحت
- السلام عليكم
- وعليكم السلام
- والنبي ممكن حبة شاي ومعلقتين سكر؟
- لا والله آسف , أنا لا أشرب الشاي وبالتالي لا أشتريه
- طيب كوباية
- برضه آسف , أصل الدكتور مانعني من الشرب أساسا
- طيب فوطة .. فرشة .. ملاية .. مكنة حلاقة .. أي حاجة تطلع من ذمتك
- الله يسهل لك .

أغلقت الباب قبل أن أسمع أوبرا " أبويا في المستشفي " أو سيمفونية " أنا باجري علي أيتام " .
عشت بعد ذلك في حالة نفسية سيئة للغاية , وفي طريق العودة للمدينة تذكرت أغنية المطرب ( كاظم الساهر)
" أدخلني حبك سيدتي مدن الأحزان " .. لابد أنه كان يقصد المدن الجامعية .
ذهبت للغداء في ( المطعم ) كما يطلقون عليه , وهو – لمن لا يعلم – يبعد عن مباني الإسكان بحوالي سبعة كيلومترات , أو هكذا خيل لي من شدة الجوع والتعب , وقلت لنفسي أنني سأتحسن بمجرد أن ( آكل ) وستدب الدماء في عروقي ,اري الحياة باللون الوردي .
أخذت صينية وتوجهت إلي موزع الطعام (*) ولكن لشدة دهشتي وجدت الطلاب يتوجهون بالصواني إلي الحمام فسألت أحدهم :

- - هو حضرتك رايح فين بالصينية ؟
- - رايح أغسلها في الحمام
- - انت خلصت أكل
- - أكل !!! الظاهر انك مستجد
وجاء زميل له يسأله
- انت برضه رايح تغسل الصينية ؟
- ايوة , أصلها مش نضيفة
- قال يعني الأكل هو اللي نضيف

وصعقت مما سمعت , فلابد أنهما ينظران إلي النصف الخالي من الكوب ، المهم غسلت الصينية وتوجهت إلي موزع الطعام وقد سمعت أن قائمة الغداء اليوم تتكون من : أرز , خضار , فراخ ,سلاطة, برتقال , خبز بلدي ..

يا لها من قائمة شهية
وقفت أمام موزع الأرز الذي ضرب الكبشة في الإناء , ولكن يبدو أن الطريق الجوي من الإناء إلي صينيتي مليئ بالمطبات الهوائية حيث أن نصف الأرز قد وقع ثانية في الإناء , والمؤسف أن الموزع قد وضع في الصينية نصف ما تبقي في الكبشة من أرز وأعاد النصف الآخر إلي الإناء من غير سوء , وقفت منتظرا أن يملأ الصينية بالأرز ولكنه زمجر لأتحرك , وحين أخبرته أن الكمية غير كافية بدأ الغناء الأوبرالي عن ( التلاتين ملطوش ) الذين ندفعهم شهريا واختتمها بكونشرتو ( ربنا يتوب علينا من الشغلانة دي ).
ولم يختلف الحال كثيرا عند موزع الخضار , ولكني وقفت طويلا محاولا معرفة كنه ذلك الكائن العجيني الأخضر ذي الأقدام الذي يقبع في الإناء , ونظرت الي الموزع مستفسرا فقال في فخر ( فاصوليا ) فهززت رأسي أن شكرا وأنا أعجب كيف يمكنه أن يقف أمام الإناء دون أن يسد أنفه .
أما عند موزع الدجاج فقد ترددت كثيرا أن أطلب ( صدر ) بدلا من ( الورك ) ولكن نظرة شرسة علي وجه الموزع جعلتني أعدل عن ذلك .
أخذت الصينية التي امتلأت حتي ربعها – مع التفاؤل –ولكنني قلت لنفسي أن أكف عن النظر إلي النصف الخالي من الكوب .
عند الأكل اكتشفت أن الطعام هنا له طقوسه الخاصة , فالأرز يتم تنقيته أثناء الأكل, والخضار يجب أن يوضع عليه أطنان من الملح حتي يطغي علي طعمه الذي ليس له طعم – هذا قبل أن تكتشف أن الملح غير صالح للإستخدام الآدمي أساسا , أما السلاطة فيبدو أنها مضروبة بالشبشب , والفاكهة لا تؤكل , والطامة الكبري كانت في الخبز الذي كان صلبا للغاية , استحالة يؤكل أو يقطع إلاّ بمنشار كهربائي(*) , ولكنني احتفظت به لغرض في نفسي .
ووجدتني تلقائيا أتراجع عن نظرية ( النصف الخالي من الكوب ) حيث أنني- بالتدقيق- لم أجد كوبا من الأساس .
وبدأ اكتئاب المدينة يتمكن مني , وبدأت أكتسب صفة ( التتنيح ) و( السنتحة ) المميزين لأغلب طلبة المدينة .
- طرق عليّ اليوم الباب ذات الجار السئيل , مددت يدي إلي موضع أعرفه جيدا في الغرفة , وتناولت رغيف الخبز إياه .. و طااااخ .. قذفته علي رأسه , فيما بعد عرفت أنه قد نال سبع غرز في رأسه , والله أحسن .
راجع الي المدينة في منتهي البؤس ومازال صوت ( كاظم ) يطاردني " وأنا من قبلك لم أعرف مدن الأحزان " .
فتحت باب الغرفة واستعددت للحركات البهلوانية – طقوس دخول الغرفة – أولا أستدير 270 درجة في اتجاه عكس عقارب الساعة ثم أغلق الباب بكعب قدمي والقفز مباشرة مع إحناء الرأس والنزول علي أطراف أصابعي مع ثني الركبتين ثم الارتماء علي السرير , وهممت بالنوم الذي سوف ينسيني ما أمر به ولو بشكل مؤقت , ولكني فوجئت بمن يطرق الباب .. لابد أنه ذات الجار السئيل إياه جاء مطالبا بالثأر .. فتحت الباب , لم يكن هو الجار بل شخص غريب آخر

- أي خدمة ؟
- - أنا محسن
- - محسن مين
- - زميلك في الغرفة
وسقطت مغشيا عليّ

د. تامر أحمد
ــــــــــــــــــــــــــ

ـــــــــــــــــــــــــــــــــــــــــــــــــــــــــــــــــــــــــــــــ
(*) موزع الطعام : شخص يوزع الطعام
( * ) اهداء خاص الي وزير التموين

مسلسل المدينة الجامعية

انا حبدا فى موضوع جديد بس حعمله بشكل ان شاء الله يكون ظريف حعمله على هيئة حلقات عن المدينة الجامعية بس حبدا فيه كمان اسبوع
الكاتب : اى واحد ليه ذكريات أليمة فى المدينة
وقت العرض : زى ما تحب وفى اى يوم
الحلقة الاولى ان شاء الله بعد اسبوع و يا رب تعجبكوا الجلقات