عودة التنابلة
السلام عليكم طبعا غيبت كتير اوى عشان اكتب تانى بس كان فى ظروف كدا حاحكيهالكوا بعدين ان شاء الله من غير وجع دماغ ندخل على الموضوع
فاكرين موضوع التنابلة و الحاج محمد الراجل الطيب اللى مات........ طبعا مش فاكرينه اللى عايز يفتكره يقرا موضوع التنابلة
طيب النهارده بقا فيه موضوع جديد و هو عودة التنابلة دول بس مش المدينة لا دول تنابلة سموحه او مدرسة طارق بن زياد . انا برغى كتير صح ؟؟؟ نخش فى الموضوع
كان فى مدرس رياضة عندنا اسمه احمد فايز المدرس دا كنا بنغتت عليه اوى و كان شبه دريد لحام جدا الممثل اللبنانى المهم كنا نقعد نغتت عليه اوى و نخليه ميعرفش يشرح و لا اى حاجة و فى يوم فى اخر السنة بعد معاناته معانا قالنا قصته قصة حياته يعنى
هو راجل عادى اتجوز و خلف بس صرف على ولاده و علمهم فى احسن جامعات و سافروا برا و مسالوش فيه بعدها . الموضوع ان الراجل دا قالنا قصته و قالنا انا معتبركوا زى ولادى تمام و كنت عايز اعمل حاجة معاكو بجد بس طبعا و للاسف احنا بردو مسمعناش
دخلنا الكلية و فى يوم فى سنة اولى عرفنا ان الراجل دا مات .مش عارف بردو مزعلناش و عدينا الموضوع عادى على فكرة انا مش فاكر اسمه كان احمد فايز و لا ايه الصراحة كمان يعنى بس اللى فاكره انه اولمرة استاذ يتعامل معانا كاننا ولاده بجد
انا بكتب الكلام دا لانه مات فى الاوقات دى من السنة و مقدرناش حتى نقرا الفاتحة عليه
اقروله الفاتحة بجد و الموضوع دا لمدرسة طارق بن زياد الثانوية بنين
فى ذكرى استاذى
انا اسف جدا جدا جدا